אֲחִיתֹפֶל

וַאֲחִיתֹפֶל רָאָה כִּי לֹא נֶעֶשְׂתָה עֲצָתוֹ וַיַּחֲבֹשׁ אֶת הַחֲמוֹר וַיָּקָם וַיֵּלֶךְ אֶל בֵּיתוֹ אֶל עִירוֹ וַיְצַו אֶל בֵּיתוֹ וַיֵּחָנַק וַיָּמָת וַיִּקָּבֵר בְּקֶבֶר אָבִיו.     (שמואל ב י"ז כג)  

אֲחִיתֹפֶל  / יהושע רוזנברג

עוֹד כִּמְעַט קָט יַשִּׁיל הַלַּיִל

גְּלִימָה שְׁחֹרָה מְשֻׁבֶּצֶת כּוֹכְבֵי אוֹר

יִפֹּל הַטַּל עַל הָאֲדָמָה

צַלְמָוֶת יַהֲפֹךְ לְבֹקֶר

וְיוֹם חָדָשׁ יֵעוֹר תַּחַת הַשָּׁמֶשׁ,

לֹא תּוֹפַע עָלָיו נְהָרָה,

לֹא תָּבֹא רְנָנָה בוֹ.

מָחָר יֻתַּן בֵּין הַשָּׁמַיִם וּבֵין הָאָרֶץ  

הָאִישׁ הַיָּפֶה בְּכָל יִשְׂרָאֵל לְהַלֵּל מְאֹד

תָּלוּי בָּאֵלָה בִּשְׂעַר רֹאשׁוֹ  

וּשְׁלֹשָׁה שְׁבָטִים תְּקוּעִים בְּלִבּוֹ,

לֹא יִשַּׁק עוֹד הַמֶּלֶךְ לְאַבְשָׁלוֹם

וְלֹא תִרְאֶינָה עֵינַי.

מָחָר תְּשַׁכֶּל חֶרֶב,

יֶרֶב הַיַּעַר לֶאֱכֹל בָּעָם

בִּגְלַל אֲשֶׁר לֹא קִבְּלוּ

אֶת עֲצַתִי הַטּוֹבָה.

מָחָר יִלְאַט הַמֶּלֶךְ אֶת פָּנָיו

יִבְכֶּה, יִזְעַק קוֹל גָּדוֹל וִיבַכֶּה

בְּנִי אַבְשָׁלוֹם אַבְשָׁלוֹם בְּנִי בְנִי,

כִּי סִכֵּל חוּשַׁי אֶת הָעֵצָה

אֲשֶׁר יָעַצְתִּי בַּפַּעַם הַזֹּאת

וְלֹא תִּשְׁמַעְנָה אָזְנָי.

עוֹד כִּמְעַט קָט

אֲכַלֶּה לְצַוֹּת אֶל בֵּיתִי

עוֹד כִּמְעַט קָט

נוֹעַ יָנוּעַ הַחֶבֶל כַּשִּׁכּוֹר

וְיִתְנוֹדֵד כַּמְּלוּנָה

כִּי יִכְבַּד עָלָיו מַשָּׂאִי

כְּכֹבֶד אֶבֶן וְנֵטֶל הַחוֹל

אֶפֹּל וְלֹא אֹסִיף קוּם

עַד נֵצַח לֹא אֶרְאֶה אוֹר

לֹא אוֹסִיף לִהְיוֹת עִמָּכֶם

לְהִתְהַלֵּךְ בְּאוֹר הַחַיִּים.

עוֹד כִּמְעַט קָט

אֵחָנֵק, אַחֲרִישׁ וְאֶגְוָע

בַּל יִרְאוּ עַפְעַפֵּי שָׁחַר

כִּי שָׂבַעְתִּי קָלוֹן גַם בּוּז

וְהַבֹּשֶׁת אָכְלָה אֶת יְגִיעִי

כָּל הַיּוֹם כְּלִמָּתִי נֶגְדִּי

וּבַל  יִשְׁמְעוּ אֲבַדּוֹן וָמָוֶת

כִּי הָיִיתִי לְחֶרְפָּה וּלְמָשָׁל לִשְׁנִינָה