כִּי אִם שָׁנִים הַרְבֵּה יִחְיֶה הָאָדָם בְּכֻלָּם יִשְׂמָח

כִּי אִם שָׁנִים הַרְבֵּה יִחְיֶה הָאָדָם בְּכֻלָּם יִשְׂמָח / יהושע רוזנברג

גִּיל, עוֹלֵל, בִּימֵי יַנְקוּתְךָ

הֲיִי שַׁעֲשֻׁעִים יוֹם יוֹם, פָּעוֹטָה

שִׂישׂוּ גְּמוּלֵי מֵחָלָב עַתִּיקֵי מִשָּׁדָיִם

כִּי כַּעֲנַן בֹּקֶר עוֹבְרִים יְמֵי שְׁנוֹתֵינוּ.

הִתְעַנֵּג יֶלֶד בְּיַלְדוּתֶיךָ

שֵׁב בְּסוֹד מְשַׂחֲקִים וַעֲלֹז בְּכָל עֵת

עִם יְלָדִים וִילָדוֹת בִּרְחֹבוֹת קִרְיָה

כִּי הַיַּלְדוּת גָז חִישׁ תָּעוּף

כְּרוּחַ חָלַף וַיַּעֲבֹר.  

אַל תִּירָא נַעַר, רוּץ

מְהֵרָה חוּשָׁה אַל תַּעֲמֹד

וַעֲלֹס בִּימֵי חָרְפְּךָ  

אַל תֹּאמַר נַעַר אָנֹכִי

לֹא אֵדַע צֵאת וָבֹא

הָסֵר כַּעַס מִלִּבֶּךָ

וְהַעֲבֵר רָעָה מִבְּשָׂרֶךָ,

עֲדִי תֻפַּיִךְ וּצְאִי בִּמְחוֹל מְשַׂחֲקִים, נַעֲרָה,

שְׂאוּ עֵינֵיכֶם יַחְדָּו וּרְאוּ

כִּי הַשַּׁחֲרוּת הָבֶל

כִּי חוֹלְפִים יְמֵי הַנֹּעַר

כְּאֵד יַעֲלֶה מִן הָאָרֶץ

וְכַטַּל מַשְׁכִּים הֹלֵךְ.

חֲדָווֹת יִהְיוּ כָּל יָמֶיךָ עֶלֶם חֲמוּדוֹת

עֲמֹד עַל עָמְדֶךְ, חֲזַק וַחֲזָק

אַל תִּתְהַלֵּל בְּיוֹם מָחָר

כִּי לֹא תֵדַע מַה יֵּלֶד יוֹם

נוֹקְפִים, נְפוֹגִים עֲלוּמֶיךָ

כְּחֶזְיוֹן לָיְלָה, כַּחֲלוֹם יָעוּף.

שְׂמַח בָּחוּר בִּימֵי בְחוּרוֹתֶךָ

וִיטִיבְךָ לִבְּךָ בַּאֲבִיבֶיךָ

כִּי תִּפְאֶרֶת בַּחוּרִים כֹּחָם,

וּשְׂמַח מֵאֵשֶׁת נְעוּרֶךָ

אֲשֶׁר בָּהּ דָּבַקְתָּ וַתִּהְיוּ לְבָשָׂר אֶחָד,

כִּי כָל יָמֵינוּ כְמוֹ הֶגֶה

כֶּחָצִיר יָצִיץ וְחָלָף

וְחָזַקְתָּ וְהָיִיתָ לְאִישׁ מַצְלִיחַ,

אִישׁ מִלְחָמָה גִּבּוֹר וּבֶן חַיִל.

אַל תָּרוּץ לְבַדְּךָ, אִישׁ נְבוֹן דָּבָר

הֱיֵה אִישׁ רֵעִים לְהִתְרֹעֵעַ

אֹהֵב דָּבֵק מֵאָח

כִּי אִישׁ אֶת רֵעֵהוּ יַעְזֹרוּ,

אַל תֹּאמַר: צָעִיר אֲנִי לְיָמִים וְאַתֶּם יְשִׁישִׁים

עַל כֵּן זָחַלְתִּי וָאִירָא מֵחַוֹּת דֵּעִי אֶתְכֶם.

צְהַל זָקֵן מְלֵא יָמִים

עַל הֲדַר זְקֵנִים שֵׂיבָה

כִּי עַל דְּרָכֶיךָ נָגַהּ אוֹר

גַּם אִם זָקַנְתָּה, יָשֵׁשׁ, בָּאתָ בַיָּמִים

מָלְאוּ יָמֶיךָ לָלֶכֶת עִם אֲבֹתֶיךָ

לֹא תָּשׁוּב לִימֵי עֲלוּמֶיךָ,

רַנֵּן,  פַּזֵּז, כַּרְכֵּר עַד שְׁחָקִים

עַד אֲשֶׁר תָּשׁוּב הָרוּחַ

אֶל הָאֱלֹהִים אֲשֶׁר נְתָנָהּ.